الحمله الصليبيه وبدايتها
خطاب رجل دين تسبب فى أذى استمر ٢٠٠سنه عالاقل.
ملايين البشر ماتت بسببه.. حتى الحيوان والشجر والحجر طاله الأذى.
تعالى نتكلم عن جُمل وعبارات هى محور الفكرة اللى قامت على أساسها الحملات الصليبية.. اهم جُمل منهم قالها اوربان الثاني فى خطابه الشهير
"دعوا اللصوص يصبحون فرساناً."
"Deus lo vult!" "هي إرادة الرب!"
"ووهبنا هذه الأراضي التي تفيض لبنًا وعسلاً"
طبعا التشجيع واضح اوى... والمعنى واضح اوربان الثانى قال لهم بالبلدى. روحوا انهبوا الشرق احسن ما انتم هنا بتقتلوا بعض وتتخانقوا.
وكان اول درس دينى فى تاريخ البشرية كلها اتسبب فى حرب ممكن نسميها حرب عالمية.
حنجرة اوربان الثانى جلجلت بالخطاب و الناس اللى واقفه بالآلاف هتفت باسم الرب ورجل الرب
وفى لقطه تاريخيه ومن باب التشجيع البابا عمل اوكازيون وتخفيضات وعروض وسحوبات تجنن
البابا بما انه رجل الرب وعد الجماهير الفقيرة بالغفران مجانا.... صكوك غفران ببلاش واراضى فى الشرق وفلوس ولبن وعسل.
طيب هو الحال فى الشرق كان كويس يعنى؟!
بالطبع مكنش كويس لكن بعد حملات الصليبيين المخصص للنهب هايبقى اسوأ وأسوأ بمراحل
المهم البابا استمرت الدعاية بتاعته لمده اربع سنين تحميس وتشجيع ورسائل للملوك والشعوب وكلف كل الكنائس انها تدعو الشعوب للحرب لنصرة الصليب
البابا كلف القساوسة والرهبان بعمل حملات إعلانية واعلامية مكثفه.. وظهر اتنين من الرهبان بقوا من أشهر رجال الدين اللى استطاعوا يحققوا نجاح وقتها
...
الأول هو "بطرس الناسك" وده جمع حوالى ٢٠الف مقاتل وقدر يتحرك بحملة هى الاصح بتسميتها الحملة الصليبية الاولى... لكن بصراحه انا عجبنى وصف المؤرخين الأوروبيين اللى وصفوها بحملة الرعاع
الراهب "بطرس الماسك" وصفوه انه كان بيمشى حافى فى ملابس معفنه ريحتها تقرف وأحيانا بيركب حمار اعرج... استجاب لدعوته الالاف زى ماقلت لكن مين اللى استجاب له؟!
الناس الفقيرة اوى اوى "العشوائيين" وانضم معاهم قطاع كبير اوى من الحرامية وقطاع الطرق واللصوص... هنا بس اقدر اقولك ان جملة البابا اتحققت. "دعوا اللصوص يصبحون فرساناً."
حملة الرعاع بتاعة بطرس اتحركت بدون نظام او تنظيم البلاد فى شرق أوروبا اتفاجئت بالرعاع بتمر من بلادهم... ايه رايحين فين؟!.
. ابدا رايحين ننصر الرب... طب ربنا معاكم
لكن مرورهم كان أذى للبلاد دى رغم ان الاهالى مسيحيين زيهم.. جيش الرعاع ارتكب جرائم سرقة ونهب واغتصاب وخطف لا يمكن تخيلها.
اوعى تستغرب اغلبهم اساسا دى شغلته فى بلده اوعى تقتنع ان واحد منهم رايح يتوب... وبعدين ده معاه وعد من البابا ان خطاياه مغفورة... ورايح يحج لبيت المقدس كمان... يعنى حج مبرور وذنب مغفور.
ما علينا نرجع للشخص التانى إلى عمل نفس حركه الراهب بطرس... هو راهب تانى اسمه "والتر المفلس" وعمل نفس السيناريو اللى عمله بطرس بالحرف.
الحملة اتحركت لغاية ما وصلت اطراف القسطنطينية وحصلت مواجهه بين جحافل الرعاع وبين الإمارات البيزنطية بهدلوهم... والى اتبقى من الرعاع ووصل لمناطق السلاچقه قدر "تتش ابن الب أرسلان" وحلفاؤه انهم يدمروهم.
. وانتهت الحملة الصليبية الاولى الحقيقية.
طبعا المؤرخين فى الغرب بيتجاهلوها نظرا ان سيرتها تكسف... لكن تأثير الحملة دى كان نتيجته لها وقع تانى
اولا كان درس للبابا اوربان انه يعيد تخطيطه وينصح بتكوين جيوش نظامية وده اللي هايحصل فعلا
ثانيا فيه عائلات سابت بلادها طمعا فى كنوز الشرق وانضمت لحملة الرعاع.. طبعا تم ابادتها ظهر هنا لعبة خدوا بتارهم ياجماعه انتوا هاتسكتوا؟! طبعا اقاربهم وعائلاتهم هتفت "يانجيب حقهم يا نموت زيهم".
ثالثا بقى والأهم..حملة الرعاع لفتت انتباه كل ارجاء أوروبا لفكرة البابا... يعنى تقدر تسميها دعاية مجانية على حساب الفقراء والحرامية واللصوص.
المرة الجاية لو ليا عمر نبقى نشوف حصل ايه.
لغاية هنا وخلاص خلص الكلام
#يلانروح_مصر
تعليقات
إرسال تعليق