الملحمه mal7ama

نهايه الملحمه جيم اوف ثرونز اللي بالرغم من الموسم الأخير المخيب هيفضل برضو أفضل مسلسل فالتاريخ بالنسبالي و دا مش بس راجع لعظمه المسلسل لكن كمان لتفضيلي الشخصي لإن نوعي المفضل الخيال العلمي و الفانتازيا الملحميه اللي بشوفهم أرقى أنواع الفن لأنهم خلق عوالم مش موجوده مش بس بناء قصه على العالم الواقعي و لورد اوف ذا رينجز هو فيلمي المفضل من ساعه ما شوفته من ١٣ سنه لحد النهارده و من ساعتها مكنتش أتصور أن هييجي عمل فانتازيا فعظمته و لما شوفت جيم اوف ثرونز لاقيت كل اللي بحلم بيه لأي عمل فانتازيا ملحميه موجود صراع معقد جدا على جبهات كتير الأسطوره و السياسه و الحرب و الحب و التضحيه و الخيانه كل دا موجود عالم كامل بجغرافيته و ثقافاته و لغاته و أديانه و أساطيره و قيمه كل حاجه معموله بعنايه فوجود العظمه دي كلها فنوعي المفضل الفانتازيا الملحميه خلاه بالنسبالي أفضل عمل فالتاريخ حتى لو كان انتهى بأسوء من ما أنتهي عليه لأنه بالنسبالي أكبر من مجرد نهايه تحكم على كل شئ و لأن النهايه الحقيقيه اللي مستنيها لسه مانزلتش ماظنش ان فيه عمل أتعمل فالتاريخ فيه كميه اللحظات الملحميه اللي فالمسلسل دا من ٧٣ حلقه هنطلع عالاقل ١٠ حلقات في إجماع على عظمتهم و وجودهم ضمن الأفضل فالتاريخ صحيح المسلسل أنتهي لكن تأثيره لم ينتهي المسلسل دا خلق حاله عالميه و شعبيه غير مسبوقه محصلتش فالتاريخ لدرجه انه هيغير مستقبل و خريطه المسلسلات فالمستقبل عامه و الفانتازيا الملحميه و الإنتاج الضخم للتلفزيون هينتشر بقوه الفتره الجايه بعد ما كانت أعمال الفانتازيا قبل الثرونز درجه ثانيه بقصص و إنتاج متواضع زي مغامرات زينا و غيرها بعد النجاح الأسطوري للثرونز هتبقى فالمقدمه و هيترصدلها أضخم الميزانيات و بالفعل دا بدا و في عالأقل خمس أعمال فانتازيا ملحميه ضخمه جايه فالطريق فالكام سنه الجايه زي لورد اوف ذا رينجز اللي أمازون رصدت مليار دولار لإنتاجه و أتمنى فعلا أن الموجه دي تنجح و نحصد تأثير جيم اوف ثرونز اللي اتمنى يفضل ممتد عشرات السنين الجايه و الفانتازيا الملحميه تاخد المكانه اللي تستحقها و نصيحه للي حب المسلسل دا أقرأ الروايات لأن المسلسل على كل جماله و عظمته دي ميجيش حاجه فعظمة الروايات الأصليه انا كنت متردد اقراها فتره طويله عشان ضخمه قوي و هبقي عارف الأحداث لكن بعد ما بدأت فيها مقدرتش أسيبها و مكنتش عايزها تخلص الروايات مش بس بتعرض الصراعات الخارجيه بتفاصيل أفضل و أكتر بكتير من المسلسل دي كمان بتعرض نفسيه الشخصيات و صراعاتهم الداخليه بريشه فنان مبدع غير كمان ان من اول الروايه الرابعه الأحداث بتاخد منحني مختلف خالص و معقد عن المسلسل اللي هي بدايه الموسم الخامس و بتلاقى شخصيات رئيسيه و خطوط أحداث كامله رئيسيه و ممتازه محذوفه من المسلسل و دا في رأيي اللي قلل المسلسل كتير فالمواسم الاخيره و وصلنا للنهايه السيئه اللي تمت بس فالروايات التعقيد دا و كل الخطوط دي هي اللي هتقودنا للنهايه الحقيقيه للملحمه اللي أتنشر منها ٥ روايات و باقي فيها روايتين ربنا يسهل و عم جورج مارتن ينزلهم و بالمناسبه الترجمه العربيه من أروع ما يمكن للرائع هشام فهمي و أخيرا اتمنى النجاح الخرافي للمسلسل فالمنطقه العربيه اللي للمره الأولى عمل فانتازي ينجح بالشكل ده فالمنطقه و كمان ترجمه الروايات تفتح الباب و تشجع ترجمه أعمال تانيه فمجالات الفانتازيا و الخيال العلمي اللي للأسف مهمله و عدد الأعمال المهمه المترجمه فالمجالات دي تتعد عالصوابع و أتمنى كمان تشجع المؤلفين العرب يكتبوا فالمجالات دي اللي تقريبا فاضيه محدش بيكتب فيها